查看完整版本: [口語] 從正中學　＊　中五重讀生“愛”的故事　←（？）

[口語] 從正中學　＊　中五重讀生“愛”的故事　←（？）

[quote][b][color=Red]請注意:

由於本篇中人物姓名疑似個別明星,

故特此公告,

[u]本篇內容與任何人物、團體無關.[/u]

謝謝!![/color][/b][/quote]



人物介紹：

陳冠晞，十七歲半，本故事的男主角，於本屆會考中取得五科合格的成績，後到從正中學重讀中五。
性格「順得人」，健談的男孩，人緣非常佳。

鍾檜桐，十八歲，本故事的女主角。在上屆會考中取得零分的成績，在從正中學重讀中四中五。
神秘的女孩，完全不健談，網路上與現實中的她完全不同，而且在學校也似乎是完全沒有朋友的樣子。

溫子峰，十六歲，陳冠晞在從正中學認識的朋友。比冠晞小一年的他並沒有考過會考，中三時被原校淘汰出來後，轉到從正中學讀中四，跟檜桐是同級同學。
相當愛管閒事，是班上路透社的一員，同時隸屬學校的籃球隊。

陳冠吟，十四歲，陳冠晞的弟弟。他在冠晞以前待過的直資中學讀中三，成績非常優異。
為人相當「寸」，或者是因為優秀的關係，在學校裡很受歡迎。

第一回　　十分會考生的自白

　　大家好，我個名叫做陳冠晞……喂！大家千祈唔好誤會喎！我同陳冠希哩個人係一啲關係都冇，仲有，呢個唔係我既網名，亦都唔係咩假名，係真名。雖然我知道哩條友曾經同一啲女明星、阿嬌啊果啲喺「艷照門事件」裡面俾人熱炒……不過我阿爸阿媽改到我個名同佢嘅差唔多，就係差緊一個「日」字……我都冇辦法架，係咪先？

　　我今年十七歲，過埋今年嘅九月就十八啦。我同其他中五同學一樣，由四月開始考會考，直到啱啱八月放榜。你哋又估下我嘅成績係點丫？如果你哋以為我考到個十優返黎，咁就大錯特錯啦！十優冇我份，十分就有我份！唉，我都知衰架啦……中四嗰陣日日上堂都掛住同阿朱同蛇仔佢地傾計，返到屋企又掛住上論壇同班友吹水，一係就下載啲動畫落黎睇，掂都唔掂下啲書，結果，咪搞到今日咁嘅田地囉！

　　好在，我都有啲小聰明，由細到大都係讀死書嘅材料。臨時抱佛腳，抱唔到佛腳，都扯得甩佛祖對鞋。由二月開始日日開夜車死銼爛銼，最終都五科「排屎」左，中文科卷一仲有Ｂｏｕｎｓ，俾我考到個第五級番黎添！我阿媽話，如果我今次會考中英文科都合格，即使我成績唔好，都會俾我重讀中五；如果唔合格，就要我出黎搵野做喎！講真丫！我連三科主科都唔合格，出黎見工邊個會請丫！咁多大學生排隊見工，幾時輪得到我丫？哩一次可以重讀，我真係應該「感謝天父！阿門！」啊！

　　不過，話就話重讀啫，我問左好多間直資學校，佢哋都話十分唔會收。咁又係嘅，得嗰十分，係「蚊水」啲架啦！又有啲學校叫我填左表先，然後返屋企等消息。唉！又係凍過水啦我心諗，都唔敢抱咁大期望囉！公校唔收，我惟有去考慮夜校同私校啦，我阿媽唔贊成我讀夜校，話夜校六點幾上堂，九點十點至放學，會搞到我嘅生活日夜顫倒喎！

　　結果，阿媽要我去報私校。但係私校啲學位咁貴，要因住個價錢真係好鬼難揀架！聽某某親戚朋友講，喺長沙環好似有一間叫做從正中學嘅私校，佢係以學生嘅會考成績黎計算學位既價錢嘅。簡單啲講，啫係「分數愈高，收得愈平」啦！就咁聽佢講，我都唔知到底揀唔揀呢間學校好，不過八月都已經過左一大半，再唔扑鎚我真係驚間學校冇位……

（待續）

第二回　INTERVIEW

　　「你叫咩名啊？」
　　「陳冠晞。」
　　「咩話？」
　　「我叫陳冠晞。」

　　又黎啦又黎啦……喂，咁我個名係真係叫陳冠晞啊嘛……我填張申請表格果陣都寫左啦！做咩好似當我怪人咁望住我啊？！

　　哩位老師眼定定咁望左我幾秒，然後又重新望返住枱面份表格。

　　「申請重讀中五啊？」
　　「係啊。」
　　都話左份表格有寫咯……你哩個問題係唔係無聊左啲啊？
　　「會考幾分啊？」
　　「十分。」
　　阿Ｓｉｒ，我咪交左我份會考成績通知書個副本俾你囉……你使唔使問完又問啊？

　　唉！哩幾日啲親朋戚友係咁打電話黎，問我阿媽我會考幾多分，哩條問題我已經答到唔想再答啦！

　　「你要揀既科目係世界歷史、中國歷史、地理同經濟？」
　　「……係。」
　　「你以前有冇讀過架？」
　　「我冇讀過中、世史，其他都有讀過。」

　　我喺上年中四揀科果陣，揀左地理、經濟、綜合人文同會計，結果讀左唔夠三個月我就當左科會計嚕！我根本就唔鍾意讀，會計科又要計數又要記住啲專有名詞，咩開支、收入之類，仲要用英文黎教喎！真係……煩都煩死啊！

　　「你既地理、經濟同綜合人文科都合格……哩幾科應該唔使太擔心……只係中、世史你完全冇接觸過……今年要一次過追返曬人地用左兩年時間黎讀既所有課程……你要有心理準備，會追得好辛苦。」
　　「我喺中三果年有讀過下中、世史架，同埋我不嬲對歷史故仔都有好大興趣架。」

　　的確，由細到大我都好鍾意同歷史有關既科目，不過我阿媽果陣都唔肯俾我揀哩啲科，佢話讀歷史第日搵唔到野做，冇出色喎！
　　結果我揀左一啲我根本冇興趣既科。冇興趣，又點會有心機讀丫？上堂果陣我完全冇ｍｏｏｄ去聽老師講野，哩一個其實都係間接令到我考到今時今日咁既成績既原因之一……

　　「中三同中五既課程唔一樣架，中五既課程會多左好多理論性既野，仲有戰況分析之類既題目，唔係就咁背下野就俾你ｐａｓｓ，要加埋你自己既分析至得架！」
　　「我知……不過我對自己既分析能力一向都好有信心。」

　　戰況分析之類既題目，係咪姐係類似中文科寫論說文果啲啊？哩啲我一向都係最拿手架喎，每次考作文揀題目我都一定揀論說文，因為我有信心實ｐａｓｓ架嘛！

　　「既然你咁有信心，咁我地亦都俾一次機會你重讀中五，希望你可以珍惜哩個機會，喺下年會考裡面攞到更加好既成績！」
　　「係，我知道啦，多謝曬。」

　　雖然，哩間學校其實只要你有錢就可以入讀……不過，循例都要講句「多謝」既。我拎住份申請重讀中五既表格，行去會計部度交註冊費，總算係暫時了結左一件心事……

（待續）

十卜...
個d主角名...
哈...
十卜...