巧心 2007-7-27 15:10
[u][color=Orange]-0-` o 咀 囉 ...
佢 地 咁 大 聲 講 野 ...
乜 無 人 理 嫁 咩 !?
support 你 喔 `[/color][/u]
風間離 2007-7-27 23:46
加油ㄚ
諗住一次過睇晒囉..
點知後邊竟然未post,,,
嗚嗚///我要睇啦
快d拉..
我等你ㄚ
Yuke 2007-7-28 00:12
時間過得真係快，話咁快我地同阿逸已經識左成個月有多。
大家都係咁過啦，日日返學放學，夜晚就去行街食飯唱k睇戲。生活日日如是，話悶唔悶話過癮唔過癮，習慣lu。
最近我同阿逸玩得好埋。無他既，咁四個男仔之中就係得佢同阿龍無女朋友，我同阿龍傾落之後又覺得唔係咁岩嘴型啦，反而阿逸同我岩傾d，咁咪自自然然同佢走得好埋囉。
阿奈曾經問過我，發唔發現阿逸對我特別好，我就答佢唔覺。
佢話阿逸有時朝早會買埋早餐返黎比我食，有時佢地出聲串我會幫住我，出街買野食個陣買親都係我鍾意食既，又呢樣又個樣，總之就多不勝數，對我有意思咁話。
我當然唔覺得阿逸對我有意思啦，阿奈呢番說話全部比我推翻左。雖然我的確會有早餐食，咁但係佢自己都要食早餐架，順手買埋我個份都好正常姐。佢地串我佢幫住我，係因為佢平時都已經串到夠本啦嘛，見我咁慘咪幫下口囉，正常。之餘買野食啦喎…咁係朋友既，識得咁上下都會知大家鍾意食咩架啦，我夠成日買到阿奈鍾意食既野囉，唔通我又對佢有意思咩？
以阿奈既性格，就算我咁講都好，當然都仲會有一大堆唔知係道理定歪理既拎出黎同我講啦。不過我通通都當耳邊風，係我角度黎講，我完全唔覺得佢會鍾意我，何況佢一日無表態，我自然仲係當佢朋友，如果無啦啦走去問佢，容乜易比佢話我表錯情架？到時唔係既話會好瘀架嘛。
呢日夜晚我一個人無無聊聊係屋企hea，都唔知有乜好做，機又打過電視又睇過，咁既生活真係悶到發脾氣。
Hea到咁上下，唔係啦，都係打個電話問下阿奈今晚有咩做，好過係度悶呀。
（接駁鈴聲：別再做情人，做隻貓做隻狗，不做情人…）
「喂，做緊咩呀？」
「無野做，係度對住部腦發呆，悶到想死。」
「係囉，我都好悶丫…喂，不如今晚落D囉？」
其實我之前都有提意過落去玩，係我記憶中我記得以前都有同阿奈落去玩既習慣，當然啦，我仍然記得自己係一個唔吸毒既健康小寶寶黎。但係我講過幾次都係阿奈拒絕左，而家咁悶我梗係想求佢比我去啦。
「落乜鬼呀？我咪話過唔比妳落囉。」
「唔好啦…做咩唔比我落姐？」
「咪話過妳岩岩出院身體唔好唔比妳去囉，仲問？」
「咁而家都好返晒啦！比我去啦…真係好悶呀…」死纏難打，阿奈一定會心軟。
「唔得呀！」睇妳口硬得幾耐。
「黎啦，一次！一次咁多！去一次啦！」我誓神劈願。
「唉，怕左妳。一次咋！真係一次架咋！」
噢！Yes！成功！Yeah！
「Yeah！咁我換衫，一陣落下見啦！」
收左線之後我就啦啦臨換衫，唔快d容乜易阿奈改變主意架？
換完衫仲用九秒九飛落街等佢。不過落到去之後我就開始後悔，一早知佢係例遲，我咁早落黎做乜鬼？搞到而家戅居居企係條街度食風。
過左幾分鐘，終於見到阿奈同阿sam一齊出現。
「咁鬼耐架妳。」
「出門口整野遲左丫嘛，等陣駛死咩？」
正想伸手截的士，阿鋒出現。
「喂！做乜條友會係度架？！」阿奈一見到佢出現就問阿sam。
「平時都係呢個時候落去架啦，係度見到有咩咁出奇？」
「阿ka係度架嘛！不如我地唔好落去啦？」
「而家唔見都見到，落去啦，咁樣避法仲尷尬。」
「咁岩既？」我見到阿鋒就同佢打左聲招呼。
「咩咁岩丫？撞鬼就真，我地行啦。」阿奈一手就拉左我行。
∼∼Disco∼∼
落到去無耐已經撞到好多以前既fd，一個二個都問我呢排去左邊度蒲。蒲鬼蒲馬咩，訓左成個月醫院，又休養左成個月，蒲到先得架。
「喂，咁耐無見妳，去左邊呀？」其中有個fd走埋黎問我。
「唉，唔好提啦，入左廠成個月，而家先叫做好返d。」
「下！妳唔係take野take到入廠呀？！」
「我take野！？你無病呀？！第一日識我呀？明知我唔掂呢味野架！」
「乜呀，妳之前…」佢都未講完，已經比阿奈快快手遮住個口，仲要拉走埋佢。
「咪亂講啦！佢失左憶，有d野唔記得架啦。」佢細細聲同條友講。
「失憶！？搞咩搞到咁大單呀？！」
「殊！咪咁大聲啦！總之就煩啦，佢唔記得架啦，你咪亂講就得啦。」
「喂，無啦啦又係度咬咩耳仔呀？」我好奇，做咩次次講到一半都走左去咬耳仔？
「下？無野，我岩岩同佢講起d野之嘛。」阿奈答我。
「挑！懶神秘！一個二個整蠱造怪，有咩好快d講我知啦啵！」
「無啦無啦，真係無野。」個fd見我起疑就同阿奈打眼色。
「係囉，邊有野姐？妳心多咋嘛，我地去跳舞啦。」
算啦，佢地唔講都無計。雖然我一直都好懷疑，硬係覺得佢地有野暪住我咁。
其實都幾無癮架，次次問阿奈佢地都係咁既反應。直覺話我知，佢地一定係有野唔比得我知。不過都無法啦，佢地唔講都吹佢地唔漲。尤其識左阿奈咁耐都知佢係咩人黎，佢唔想講既話你係點問都無用既，倒不如留返啖氣黎暖下肚好過。
阿奈拉左我落舞池，咁我又唔take野既，除左跳舞之外就係四圍望下有咩靚仔架姐。望下望下，又見到條仔好熟口面咁。哈，佢咪阿逸？
估唔到係咁又係度撞到佢啵…睇佢個樣仲好似好爆咁tim。
「喂！」我賣甩左阿奈，行左過去叫佢。
「喂，咁岩呀？」
「我同阿奈落黎玩之嘛，你又會係度既？」
「悶丫嘛，咪落黎坐下囉。得妳兩個咋？」
「唔係呀，阿sam佢地都係度。」
「喂！妳去左…」阿奈行到過黎搵我，都未問完我就見到阿逸，「咦？咁岩呀！」
「係囉，今晚真係齊人。」
「撞到你就岩啦，你同我睇住佢一陣。記住千其唔好比佢同阿鋒講野，我過去搵一搵阿sam。」阿奈一講完之後已經行左去。
「喂！妳去邊呀？」見到佢走既我梗係第一時間想捉住佢啦。
「佢去搵阿sam呀，叫我睇住你。」阿逸拉住我。
呃…我望一望阿逸個樣…真係唔好意思，我都唔想咁問，不過我真係唔知而家究竟係邊個睇住邊個囉。佢都已經爆到豬頭咁，仲邊可以睇住我？唔駛我照顧返佢我已經偷笑啦。
Yuke 2007-7-28 00:12
「老公！」阿奈行到吧檯邊阿sam。
「做咩呀傻妹？」阿sam一聽到阿奈把聲已經笑到四萬咁口。
「無呀，見你一個人坐係度悶咪過黎陪你囉。」
「妳唔係去睇住阿ka咩？」
「頭先撞到阿逸呀，有佢係度唔駛我啦。」
「其實妳都唔駛咁緊張啦。」
「咪啦！點知佢兩個傾計既話條粉腸會唔會再講d咩黎hurt佢架？」
「阿鋒個日都係一時衝動先會咁講架姐，佢見到阿ka跳樓都知自己衰啦。」
「咁就死啦！要阿ka跳樓先知自己有唔岩，咁佢咪十條命都唔夠死！？」
阿sam同阿奈係呢邊為我既事傾緊，我同阿逸就係舞池跳舞，而阿鋒同阿龍呢，就坐左係另一邊傾計。
「喂，做乜無黎心機咁呀？」阿龍一路聽歌一路問。
「無呀，無事喎。」
「OK…你話無事就無事啦下。係呢，阿柔今晚唔跟埋你黎既？」
「你知佢一向唔多鍾意呢d地方架啦，咪由佢係屋企靜下囉。」
「話時話，佢又會無啦啦轉左黎我地學校既？」
「鬼知佢發咩神經咩？問佢又唔肯講…」
「佢唔係諗住黎睇實你，唔比你溝女呀？」阿龍講笑咁問。
阿鋒無出聲。咁又係既，呢d笑話平時講既或者真係笑得出，但係而家咁既情況，係人聽到都唔會覺得好笑啦。
「喂，好
Yuke 2007-7-28 00:13
希望你地鍾意睇啦::q22
風間離 2007-7-28 01:29
好中2ㄚ
點解post得甘少
好想繼續睇落去ㄚ...
[[i] 本帖最後由 風間離 於 2007-7-28 01:31 AM 編輯 [/i]]
Yuke 2007-7-28 08:32
[quote]原帖由 [i]風間離[/i] 於 2007-7-28 01:29 AM 發表
好中2ㄚ
點解post得甘少
好想繼續睇落去ㄚ... [/quote]
post少d希望吸引人呀ma,,,點知都係冇咩人黎...心淡了::r1
風間離 2007-7-28 11:41
五好心淡ㄚ
雖然少人睇姐....
但系仲我地支持你架
努力ㄚ
Yuke 2007-7-28 16:16
第三章 - 第四節 - part 1
阿逸本身已經take左野爆緊，而家仲要比人打傷左，我見到佢咁既樣都唔係好放心，於是陪佢一齊返佢屋企。
「點呀，你真係無事呀？」我扶到佢返入屋，一入門佢就攤左落梳化。
「無事喎，妳少擔心啦。」
「Sorry呀…」一路返黎我都係度諗，究竟因咩原因阿鋒會打佢呢？
「做咩無啦啦講sorry？」佢望住我笑。
「咁你比人打丫嘛…」雖然我諗唔通阿鋒因咩郁手，但係直覺話我知件事唔多唔少同我有d關連。
「傻啦，都唔關妳事。」
「你塊面瘀晒啦，不如我去煮隻雞蛋比你去瘀啦。」見到佢塊面瘀左一大撻，就算係朋友都應該照顧下佢既。
「嗯，妳小心d。」
去到廚房，拎左個煲放好手就落埋隻蛋落去煮。
所有野都係瞬間發生，先係阿逸錫我，後有阿鋒郁手，由發生到而家都未有心情時間比我去慢慢諗清楚每一件事。唯有係呢個等蛋熟既時間諗下，我就企左係個爐頭面前，諗野諗到入晒神。
真係唔明，阿鋒做咩會打阿逸呢？唔通同阿逸錫我個啖有關？但係又無理由架，佢自己都有女朋友啦，平時同我又無咩兩句，就算阿逸同我做左d咩都唔關佢事啦。而阿逸又做咩會錫我？佢唔係take野take到傻左呀？
水滾，我小心翼翼拎起隻蛋，點知後面突然有人攬住我。
我嚇左一跳，成個人彈起之餘仲撞到個煲，d熱水彈晒出黎，仲彈到我隻手tim。
「哎呀！好痛…」我即刻叫。
「點呀！妳無事呀？！」原來攬住我個個係阿逸，佢見我整親隻手，即刻就好緊張咁捉住我隻手黎睇。
「好痛…」好彩得少少水姐，如果唔係隻手熟左都似。
佢捉住我隻手去水龍頭度沖水，一路望住我，我feel 到佢眼神入面好似有d內疚囉…
「得啦，我無咩事。」佢捉到我隻手咁實，又比佢咁樣望住，搞到我唔好意思，於是我輕輕縮返隻手，然後擰返轉繼續整隻蛋。
「我…有d野想同妳講…」靜左一陣之後佢同我講。
「嗯？」初時我無為意，漫不經心咁問佢。
「做我女朋友好唔好？」
如果而家係d漫畫男主角表白的話，咁我呢個女主角頭上一定有個好大既感嘆號加問號！佢頭先係咪比人打傻左呀？！呢句野驚嚇程度拍得住d鬼片喎！
「下！？你講咩呀？唔好玩啦，你梗係仲爆緊先係度亂講野姐。」咁真係唔好玩丫嘛！平時佢對住我串黎串去又成日鬧我，點會無啦啦鍾意我喎！
「我認真架。」
「唔玩啦唔玩啦！你梗係睇我咁幫你先會咁講姐！」我擰轉身想行返出去，點知一轉身就比佢捉住左我。咁我唔知佢就企正係我後面架嘛…
「我真係認真同你講架。」佢捉住我不特止，仲借勢向前迫，佢一迫我又向後縮，縮縮下就比佢迫左埋牆。
「唔好玩啦好無…？出去啦…」
死啦，好尷尬…個心仲開始亂跳tim…老實講，雖然佢靚仔唔過阿鋒，但以佢咁既質數黎講，仲要望實你隻眼放晒電咁，都的確幾難頂下。
「妳唔信我會鍾意妳？」
「咁…平時同你玩得咁埋…無諗過你會鍾意我嘛…」
阿奈係有同我講過佢對我有意思，但係我心目中我一直當佢朋友，又點會去諗佢係咪鍾意我呢？
「咁妳而家諗下。」
「你真係認真…？」我望住佢又再問多次。
佢點左下頭。個一刻我下意識咬左下自己個嘴，我會唔會係度發緊夢咋？但係咬落去又識得痛喎，咁即係佢講既野都係真啦？！
三秒之內，佢又無啦啦錫左落黎！
呢一次比起岩岩係D個次震撼好多，話晒我而家完全處於清醒狀態。但震撼還震撼，感覺亦都比岩岩黎得真實好多。錫錫下我仲覺得好舒服，話晒當時係我記憶中係第一次比男仔咁錫嘛，我仲不知不覺攬住左佢。
「…妳好可愛…」一分鐘之後佢終於捨得離開我個嘴。
呃…哥哥你d形容詞好古怪，從來都無人話過我可愛囉…
「…痴線…」
「唔止個樣可愛…把聲仲好誘人tim…」佢愈攬我愈實，愈貼愈埋。
我真係懷疑佢有d問題，我唔覺得自己可愛加誘人囉…
但佢都未比機會我回答佢，又再次錫落黎。第三次，今次佢無前兩次咁激，反而溫柔好多。佢一路錫，隻手就由攬住我變為摸我，本來錫緊我個嘴，到變左錫我條頸。又唔知點解，佢一錫我條頸，我就成個軟晒。
「…做咩…」我掙扎，但似乎我既力量無咩用。
佢好似聽唔到我講咩咁，隻手愈摸愈上，就係佢差唔多摸到上我心口，而個嘴仍然停留緊係我條頸度不停咁錫個陣，我差d就係佢既攻勢之下叫左出黎。無錯，係呻吟個隻叫。幸好我手快，一手就遮住自己個嘴，唔係實出醜都似。
「…想嗌就嗌啦…」佢似乎睇穿左我點解有咁既動作。
「…放手啦…唔好咁…」我投降，再咁落去我怕我自己把持唔住。
佢停左落黎，但望住我個樣似乎好辛苦，好似努力壓制住自己咁。
「妳…唔想？」
「我…唔想咁快…」坦白，我其實好鍾意佢頭先咁對我，感覺好舒服，但我知道自己係第一次，加上又未決定係咪同佢一齊，唔想咁快就比佢。
「咁妳…做唔做我女朋友？」
「比d時間我考慮下先好無…？」
「岩既，妳慢慢諗下，我唔逼妳。」終於，佢都捨得放開我。
「嗯…」我望下佢，又望下檯上隻雞蛋，「咁你塊面…隻蛋…」岩岩發生左咁激情既場面，搞到我都唔知應該做咩好，連講野都講到一舊舊。
「我自己黎得啦。」佢拎左隻蛋就行返出去。
咁佢行出去我唯有跟住佢啦，出到去坐左陣，大家都好靜無野講，其實係我唔知講d咩好。
「Um…如果你無乜事咁我走先啦…」
「駛唔駛我送妳返屋企呀？」
「唔駛啦…我自己返去得架啦，好近咋嘛。」
「咁好啦，妳自己小心d，返到去打個電話比我。」
「嗯，咁我走啦，你抖下啦…拜拜。」
Yuke 2007-7-28 16:16
出左佢屋企門口我先真正鬆一口氣，如果頭先再咁落去，我真係會衰係佢手上都似。問我鍾唔鍾意佢？其實又唔係唔鍾意既，咁耐時間相處落黎，唔多唔少都有d好感，話晒佢都係個靚仔黎，性格又幽默風趣，又夠高大，理應合晒我口味。之但係叫我同佢一齊啦喎…我又好似有d猶豫。
有樣野我自己都覺得好難解釋。由出院到而家，我心入面都好似有個人係度，好掛住好想見個隻，但係我又唔知佢係邊個黎喎。個種感覺就好似拍拖同失戀之間咁，有d幻得幻失，又有d甜蜜同痛苦。當然啦，我記憶之中自己係無拍過拖無鍾意過任何人，呢d咁既形容詞都係睇小說睇返黎架姐。
返到屋企沖左個涼，坐左係床邊繼續諗頭先發生既野。諗諗下諗起阿逸叫我返到屋企打個電話比佢。Um…打個電話姐，應該唔代表d咩架呵？
（接駁鈴聲：我說過要你快樂，讓我擔當失戀的主角，改寫了劇情…）
「喂？」佢好快就接聽，好似等左個電話響好耐。
「喂？我返到屋企啦…」
「嗯…點呀妳？隻手仲痛唔痛？」
「無乜野啦，係紅左少少姐。你塊面呢？」
「仲有d瘀囉…」
「得閒自己煮多隻蛋黎散疼啦…」
「得啦…」傾左幾句，我聽得出佢把聲一直都係度笑緊。
「有咩咁好笑呀？」我問。
「無呀，想笑咪笑囉。」
「傻咩你？…咁你無野我收線啦。」
「眼訓啦？」
「下？唔係呀…」
「咁不如傾多陣先收線丫…？」
「你唔眼訓咩？」
「唔呀，有妳陪我傾電話仲邊會眼訓？」
「口甜舌滑…」呢一次，輪到我係另一邊笑。
就係咁左一句右一句你一言我一語之下，呢個「傾多一陣」就變左傾左好耐，到左朝早七點鐘，我仍然仲同佢傾緊電話。
「嘩，原來已經七點架啦？！夠晒鐘返學啦！」
「係喎…妳眼唔眼訓呀？眼訓就唔好返啦，留係屋企訓啦。」
「我唔係眼訓丫，你呢？」
「我？我仲好精神喎。」
「咁不如一齊去食早餐然後返學啦？」我主動約佢，其實係我自己肚餓。
「又好，咁我而家換衫啦，一陣係學校附近間茶記見。」
收左線之後我就去沖涼換衫。搞掂晒d野都已經七點半，睇黎今日又係遲到多。
去到茶記，阿逸已經坐左係度。
「喂，唔好意思呀，等左好耐呀？」我坐低係佢對面。
「唔係呀，我都係岩岩到無幾耐咋，幫妳叫左野食啦。」佢遞過碗通心粉比我。
「今日又遲到lu…」我一路食一路講。
「乜妳都會怕遲到架咩？」
「梗係唔係啦，我日日都遲咁滯，我怕你怕咋。」
「妳覺得我似乖學生咩？」佢笑一笑。
「唔係，睇你擒晚爆到唔知似咩就知啦。」
「落D take野唔一定係壞嘛？」
「最起碼我未見過一個係乖既…」我笑。
一路食一路講，我地就係有講有笑既情況之下完成個早餐。當我地離開茶記個陣，已經比返學時間遲左半個鐘，咁反正都係遲囉，我地當然慢慢行返去啦。吃飽飽唔好行咁快嘛，會胃痛架！
∼∼學校∼∼
阿sam同阿奈都未訓過，擒晚落完d之後就直接返屋企換衫返學。
「呵…好眼訓…」
「訓囉…」阿sam已經趴左係檯度準備入夢。
「點解阿ka咁耐都未返架呢？」
「或者唔知醒姐…」阿sam隻眼已經合埋左一半，睇黎佢真係好眼訓。
「連阿逸都唔見人喎…阿ka擒晚又無打比我，唔知有無咩事呢？」
「遲到有咩咁出奇呀？我地日日都遲架啦…訓啦…」
打左上堂鐘，miss已經入左黎課室，點晒命之後就準備上堂。
阿鋒呢個時候先慢慢行入黎，後面跟住佢既係阿柔。
「喂，早晨。」阿鋒行經阿sam身邊，一野拍落佢度。
「早晨…」佢仍然係昏昏沉沉咁。
阿鋒望左眼我同阿逸個位，見我地兩個都唔係度，眼神有些少失望，不過好快就比佢掩飾過去。
佢地上左大半堂，我同阿逸終於慢條斯條咁返到黎。
「兩個一齊遲到，仲要咁岩一齊返，去左拍拖呀？」一入課室個miss就微微嘴笑住問我地兩個。
呢個miss平時無乜野，幾好人仲幾玩得tim。或者係佢搵到岩既方法同我地溝通啦，所以佢同我地講笑我地都無乜野。
「唔好亂講啦miss，去左食早餐之嘛。」我行返埋位坐。
而阿逸就咩都無講到，笑笑口跟住我返埋位就算。
「喂八婆，妳兩個去左邊呀？」阿奈雖然係眼訓，但聽到miss問我地都即刻走過黎八下先，有野八就梗係要八埋先訓啦。
「頭先咪講左囉，去左食早餐嘛。」
「咁岩？！擒晚妳送佢返去，今朝又一齊食早餐？！」
「咩呀？咪亂講啦，擒晚送完佢返去我就返左屋企啦。係同佢傾電話傾到今朝，咪一齊去食早餐先返黎囉。」
「有d野喎妳兩個。」佢望住我奸笑。
「痴線，有乜野姐？朋友食早餐有咩咁出奇？」我其實比佢講中左心事有d慌亂，不過仍然死撐。
「仲話朋友？！妳面紅啦！」
「邊有呀！咪亂講啦！天氣熱咋嘛！」我即刻出聲反駁。
「咁涼仲話熱！？快d講啦喎！到底有無事發生？！」
「無呀無呀！朋友黎咋嘛！」
「而家朋友姐，遲下就唔知啦。唔同妳嘈，訓覺。」八唔到料梗係去訓，阿奈話都未講完已經趴左落張檯。
我望住阿逸尷尷尬尬咁笑左下，然後繼續傾我地既計。
係我地傾得好投入既同時，我就一路feel到有人望住我。潛意識之下向目光來源望左眼，點知就同阿鋒黎左個四目交投。
唔知點解一望到佢既眼神，就好似有種觸電既感覺，仲即刻心跳加速tim。我既反應係第一時間望返阿逸，雖然無左眼神接觸，但個心仲不停咁嘆嘆亂跳。
我同阿鋒唔熟，平時又無乜兩句，點解一望到佢就會咁…？
望住阿逸個陣都會有相同既感覺，但係…好似無黎得咁強烈…
紫霜 2007-7-28 16:52
好好see啊~十卜你啊~
風間離 2007-7-29 12:45
沒啦....哎呀..等得好心急啊
巧心 2007-7-29 21:26
[u][color=Orange]SUPPORT 你 喔 ![/color][/u]
Yuke 2007-7-29 21:34
上上下堂覺得好悶，於是我自己一個上左天台食煙。
正當我無無聊聊係天台望緊風景食緊煙仔諗緊野個陣，有個人行左上黎。係阿鋒。
「你又上黎煲煙呀？」我見到係佢，就笑住問句。
「嗯。」
「你…平時都係咁cool架？好似都未見過你笑既。」我好奇，佢真係好似唔識笑咁，就連問佢野佢都係答得咁cool。
「我笑個陣妳見唔到姐。」
「咁又係。」我點左下頭，「係呢，你同你條女一齊好耐架啦？我見你地成日都出雙入對咁既？」其實我都唔知自己點解會咁問，不過既然說話已經講左出口，就唯有繼續落去啦。
「問咁多做咩？八卦啦妳。」
「車！八下唔得咩…」咁我認我係八卦呀。
「妳…隻手咩事？」佢見到我隻手紅左一撻就問。
「你講呢度？」我提高隻手示意，見佢點頭我又繼續講，「無呀，擒晚阿逸比你打到塊面瘀晒，我睇唔過眼咪整隻雞蛋比佢散瘀囉，點知一唔小心咪整到囉。」
「而家無野呀？」
「無乜野，都唔痛啦。」我又望住佢笑。
唔知點解，對住佢我好似笑得特別自然咁，就好似想將自己最靚最好個面展現係佢面前。
「係呢，擒晚…你做咩會無啦啦打阿逸既？」我問左句。
佢無即刻回答我，只係望住我。隔左一陣，佢將個煙頭彈左埋牆邊，跟住向我既方向行前左幾步。
我望住佢，唔知佢下一步想點。
佢行到埋黎我面前，突然伸手捉住我，我即時同佢面對面身貼身。跟住，佢咩都無講到就錫左落我度。
唔好問我做咩唔反抗，事實係我想反抗但已經無能力去反抗。比佢錫同比阿逸錫既感覺係兩回事，阿逸錫我個陣我仲可以有意識推開佢，但係佢一接觸到我嘴唇，我已經成身軟晒，個種感覺好迷亂，完全唔知可以做d咩。
唔知隔左幾耐之後，佢終於都放開左手。
「妳覺得如果佢見到我咁對妳，佢會唔會打我？」佢拋低左呢句之後就走左。
佢所指既「佢」係阿逸？佢意思係，阿逸會因為佢錫我而打佢？
咁佢係咪想講，佢打阿逸係因為佢錫我？
Yuke 2007-7-29 21:35
事情過左幾日，情況好似變得愈黎愈混亂。
個日阿逸係屋企同阿鋒係天台錫我呢兩件事，我都無話到比任何一個人知，就連阿奈我都無講到。
唔知點解我就係唔想去講，阿鋒件事可能係因為平時見阿奈對佢既態度已經唔係咁好，覺得講比佢知佢會好大反應掛。另一方面，我唔想呢件事傳到返阿柔耳邊，或者阿鋒個日唔係有心咁做呢？總之我就唔想搞到佢兩個鬧交。
至於阿逸，我知道話講比阿奈聽都唔係咩大問題，但係講左之後，好有可能佢地會大肆宣傳，咁樣實會比阿鋒知。如果個日係天台阿鋒所講既野係真既，咁我唔敢想像比佢知道左阿逸咁對我之後，佢會有咩反應同做d咩，所以都係免了。
呢幾日，我同阿逸之間既行為愈黎愈親密，自從佢個日表明態度之後，好多野佢都唔再去避忌，反而更加進一步做主動。
另一邊，阿柔同阿鋒既關係好似愈搞愈僵。阿鋒愈對阿柔冷淡，阿柔就愈緊張佢，開始無論咩事都要管住晒。
呢日我地幾個如常係課室上堂。當然，聽書既已經無乜邊幾個，個個都係掛住做自己野多。
阿sam同阿奈一個訓緊覺，一個就係度煲緊電話粥。我同阿逸係另一邊一路吹水一路食野，講緊今晚去邊玩好。
突然之間有人拍檯，「啪」一聲好大聲。
「妳煩夠未呀！？我講左好多次我去邊唔駛妳理呀！」係阿鋒，佢拍檯企身起。
我地個個都比佢嚇親，即刻就望晒過去佢個邊。
佢鬧緊個位唔係其他人，正正就係阿柔，而阿柔就可憐楚楚咁望住佢。
「唔該妳唔好再跟住黎啦！」呢句話都未講完，佢已經走左出課室。
「搞咩呀？」阿sam比人嘈醒左，就問阿奈發生咩事。
「點知佢地呀？無啦啦同條八婆嘈，嘈完又行左出去。」
「又做咩嘈呀？」
「你問我我問邊個？你訓啦，咪鬼理佢地。」
「唔係啦，我都係出去搵下佢先。」
阿sam上左天台，但係見唔到阿鋒既蹤影。呢度唔見人，阿sam當然知道佢係另一邊。
「喂，一個人坐係度做乜呀？」佢走左過另一邊天台，終於都搵到阿鋒。
呢邊天台無人會上黎，平時靜到九彩，望出去仲好好風景tim。以前我地都知道有呢邊天台，但我地都好少會上黎。除左阿鋒一個，佢唔開心個陣會自己走黎坐。
「你又知我係度？」阿鋒連望都無望佢，隨口就問左句。
「你仲有邊度去呀？」佢坐低左係阿鋒隔離，點左支煙，「點呀？你唔係好唔happy都唔會上黎呢邊架喎，有咩你講啦。」
阿鋒靜靜地望住眼前既風景，無開口講到野。
「其實你自己揀定左邊個未姐？」
「我都唔知…」
「唔知你又咁對阿逸同阿柔？」
「……」
「據我觀察所得，阿逸而家應該係追緊阿ka架啦，雖然佢兩個都無講到d咩，但你睇佢地d舉動就知。所以你係決定追返佢既就好快手，如果唔係比阿逸追到先就喊都無謂。」
「問題係…點同阿柔分手？」
「咁我都好明白既，之前你又講到咁愛佢，但係而家又咁樣…」
「其實同返佢一齊個陣我已經有疑問，究竟我仲係咪同以前一樣咁愛佢？」
「你唔係應該諗得好清楚先做架咩？」
「當時發生太多野啦，都無咩時間比我去諗清楚。加上見返佢個一刻我真係好開心，無去諗太多就想同返佢一齊。」
「唔似你，你一向都係諗清楚先去做架。」
「我諗住同阿ka由細玩到大，同佢一齊時間又咁短，佢應該唔係太愛我先岩…我更加無諗到咁好彩佢會有左，點知…」
「咁無人會諗到搞成咁既…」
「我覺得自己對佢唔住，咁大個人第一次有呢種感覺，就算以前阿柔比人丟落街我都無咁嬲自己…」
「似乎佢個次自殺比左好大打擊你…」
「我完全無諗過佢會咁做，我唔應該講咁多野黎傷害佢…」
「人誰無過？錯左既都無得返轉頭，知道錯係邊，肯去改既咪得囉，而家仲有機會，係咪？」
「第一次覺得自己唔知應該點做…」
「慢慢諗啦，我信你一定會解決到既…」
係課室既阿柔，見到阿鋒鬧完佢之後就走左後，唔知係咪傷到佢心，所以坐左係度不停咁喊。
我見到佢喊成咁，想話行埋去安慰下啦，點知比阿奈拉返住我。
「喂，妳想做咩呀？」
「下？過去安慰下佢囉，佢喊喎。」
「人地既野妳理得咁多姐，妳同人好熟咩？坐返低啦。」
咁佢又講得岩既，我同佢兩個又唔熟，佢兩個既感情點輪都未輪到我去理啦。我都係乖乖地坐係度算啦，廢事一陣比人鬧埋一份。
阿柔喊喊下，突然好似撞邪咁，好兇咁啤住我，之後仲企起身行埋黎我度。
「啪！」一巴！我塊面即時多左五個手指印。
無啦啦比人打左巴，唔止我一個呆左，在場既人包括阿逸阿奈同阿龍都呆晒。
「喂！妳做乜呀！？」第一個有反應既係阿奈。
「唔係妳阿鋒唔會咁對我！」佢無理到阿奈，繼續啤住我兼且對我咆哮。
「我！？妳同阿鋒既野關我咩事呀！？」我用隻手指住自己問佢，佢講d野真係聽到我頭都大埋囉。
雖然幾日前係天台我的確係同阿鋒做左d唔應該做既野，但係都唔關我事架，個次唔係我做主動錫佢架，我又無引誘佢。
「點會唔關妳事呀！妳咪再係度扮野呀！」
「我扮野！？我扮咩呀？！」愈講愈過份，聽到我火都黎埋！
「妳收埋啦！咪講咁多無謂野！」阿奈見唔對路，想話拉走阿柔。
「企係度！無論如何今日都要講清楚！」我喝住佢地。點都要講清楚架啦！上次係茶記個幾條八婆話我我都算，都可以忍左佢，但係今日就點都唔得！
「好呀！講清楚咪講清楚！睇妳怕d定我怕d？狐狸精！」
「妳話邊個狐狸精呀？！咪山草藥嗡得就嗡喎！」無錯係！我係同阿鋒發生左d不可告人既事！但係我無勾引到佢喎！狐咩狸精姐！
「除左妳仲有邊個呀！？」
我正想反駁，阿奈又拉住我。
「算啦算啦，唔好同佢嘈啦！佢講咩咪由佢囉！」
「唔得！屈完一樣又一樣？上次係茶記無啦啦比人話我條氣已經唔順啦！而家仲要話我狐狸精？！」
「妳唔係咩？！第三者！係我同阿鋒一齊先架！我咩都記得架！」
阿奈見個場面就黎失控咁滯，佢都深知道再嘈落去既話阿柔就會咩都爆晒出黎，到時我就會知道晒d野，於是就拉住阿龍講。
「喂，再嘈落去唔得架啦！你快d打電話叫佢兩條粉腸落黎啦！」
阿龍咩都無講到，即刻就行出去打電話。
（接駁鈴聲：我愛你，愛著你，就像老鼠愛大米…）
「喂，你兩個係邊呀？」電話一接通，阿龍就即時問。
「做咩呀？我同阿鋒係天台另一邊呀。」
「你兩個快d落黎啦！呢邊嘈到拆天啦！阿ka仲比人打左既呀！」
「唔係呀！？無啦啦邊個同佢嘈呀？！」
「阿柔呀！唔講咁多啦，總之你兩個快d落黎啦，我地就黎撐唔住啦！」
Yuke 2007-7-29 21:36
阿sam一聽完個電話，即刻就拉住阿鋒起身行。
「喂，做咩呀？！」
「阿ka係課室同阿柔嘈緊呀！阿柔仲煎左佢一巴！」
「唔係掛！？」阿鋒聽到都唔敢磨落去，啦啦臨起身。
「總之快d行啦！遲左阿柔爆晒d野出黎就大獲啦！」
阿sam同阿鋒趕緊落黎既同時，我地仲係課室玩緊六國大封相。
「妳講野都幾搞笑喎！妳同佢一齊先又點呀？！而家無人要做你地第三者囉！」我直頭嬲到上左腦。
「妳咪扮失憶啦！呢招我都有得出賣呀！」
「喂！我真係咩都唔知喎！一係咁啦，有咩妳一個人講啦！」我真係覺得好無奈，咩事都唔知就比人打不特止，仲要話我第三者、狐狸精。
「有咩咁好講姐？唔講啦！」阿奈見阿sam佢地仲未到，唯有拖住先。
就係阿柔想開口講野個陣，阿sam同阿鋒終於都趕到落黎。
「又係度搞咩呀妳？！」阿鋒一入面就見到我塊面多左五個手指印，即刻問阿柔。
「岩啦！人齊啦！有咩唔該你地講清講楚！唔好再亂咁屈我！」我見阿鋒佢都係度，於是就提議大家三口六面講清楚。
「講咪講！妳洗乾淨隻耳仔聽清楚tim呀！睇下係咪我屈妳！」
「收聲啦！講咩呀講？！好好玩咩家陣？！」阿鋒出聲喝止阿柔。
「你咁惡鬧我做咩呀？！你而家係咪鍾意左佢丫！？」阿柔聽到阿鋒咁大聲同佢講野，即時就駁返轉頭。
「係呀！我係鍾意佢又點呀？！就算係妳都唔駛咁做架！」
我聽到阿鋒呢句真係o晒嘴…佢…鍾意我！？唔係掛！？
「認啦咩！你以前話過最愛個個係我架！」阿柔一路大叫一路喊。
「妳都識講以…咪住！我好似同返妳一齊之後都無講過呢d說話喎！」
「係呀！我係記得返晒d野呀！我同返你一齊無耐就記得返晒啦！」
「收聲呀！究竟你地係度講緊咩呀！？我一句都聽唔明呀！」佢兩個一人一句，聽到我一頭霧水，表面聽落好似唔關我事，但其實暗中唔多唔少同我有關連。咁樣落去都解決唔到問題，我梗係出聲喝止佢地啦。
「唉…」阿奈見我咁既樣，行出黎拉住我，「妳跟我黎啦，我話妳知咩事…」
「我地都係分手啦…」
「點解？你話過最愛既係我…你好愛我架…」佢聽見阿鋒講分手，喊到收唔到聲。
「呢d都係過左去架啦…」
「我有咩比唔上佢呀！？你講呀！」
「妳無野比唔上佢，甚至可以話妳既條件都比佢好，但係…我愛既係佢…」
「係咪因為我變成咁所以你先唔愛我呀…？我改丫…」
「到而家妳仲唔明？問題已經唔係呢度，就算妳無變過，我地最後都係分手收場…感覺已經唔同左啦…」
阿柔聽到之後無再出聲，淨係不停咁喊…終於，佢無講到任何一句野就行左出班房，行出呢間學校。
阿柔喊住走左，而我就比阿奈拉左上天台。
「究竟咩事呀？！聽到我一頭煙！」講真我係嬲架！而家個個都知咩事係得我一個唔知喎！仲唔係有心呃住我？
「本來我地都唔想講妳知…」
「咁即係咩事先得架？個個都話我同阿鋒有野！但係問你地你地又話無無無！」
「我都唔知點講妳知…」
「咁即係講唔講姐？！」我發脾氣，咁係丫嘛！要講就講唔講就算啦！
「哎呀！妳咩都唔記得叫我點講妳知姐？！」
「有d咩我會唔記得架？！無啦啦我又點會唔記得呀？！」
「妳記唔記得前排入左醫院，醒返個陣問我地咩事，我地答妳妳係唔小心趺左落樓既？」
「記得呀！我仲記得話左自己一句做咩咁白痴！」
阿奈接住落黎既一句，將原來怒氣沖沖既我嚇左一跳。
「個陣係我地呃住妳，其實…妳係跳樓自殺先會入左醫院…」
「…自殺…！？我！？」我愕然。
經過呢句提一提我，我個腦又好似突然閃過個日既畫面，個日又真係好似係自己跳落去…跳落去個刻我仲好似喊緊…
「其實我地幾個根本就由細玩到大…」
「我係咪失左憶？！」我捉住阿奈隻手問，呢一刻我無理到佢講d咩，只係知道自己有好多野都唔記得左。
「嗯…醫生話妳落地個下撞親個腦，有塊瘀血壓住條神經線，影響左妳記憶…」
我記住遠處既陽光。陽光好刺眼，令人望唔清前面係咩。
「妳頭先話我地幾個係一齊玩大？！即係阿鋒阿龍阿sam三個同我地？！」
「嗯…我地之間發生左好多野…經歷左好多…」
「夠啦！唔好再講住！」我深呼吸左下，「一時之間我接受唔到咁多野…」除左心臟既壓力之外，不斷思索既頭腦都變得赤赤痛。
「咁妳想知個陣先問我啦…」
「嗯…返落去睇下佢地搞成點先啦…」
我個心仲有好多疑問係度，我知繼續問落去既話阿奈一定會話晒我知，但係我驚自己一時之間接受唔到咁多野。因為我有個預感，如果我問既話，一定會有件好重要既事係我接受唔到既。最大問題係，我到而家都仲諗唔明白，點解我要自殺？
巧心 2007-7-29 23:08
[u][color=Orange]呀 柔 都 識 鬧 人 嫁 咩 "
-0-` o 咀 囉 真 係 ...
SUPPORT 你 喔 ![/color][/u]
風間離 2007-7-30 00:47
搞錯架...啊柔...做咩打ㄚka ㄚ
Yuke 2007-7-30 10:43
「有無人可以話我知發生咩事？」阿柔走左無幾耐之後，一直企係一邊既阿逸終於都開聲問。
「妳鍾意阿ka？」阿鋒無答佢，反而反問返佢轉頭。
「係，我知你都鍾意佢。」
「咁妳知唔知我同佢之前發生過咩事？」
「唔知，但我覺得無咩影響。如果佢係鍾意我既，就算你同佢發生過d咩，佢都會同我一齊。」
「既然你咁有信心，咁你唔需要知道d咩，大家公平競爭。」阿鋒笑。
阿逸聽完佢咁講都無講到野，笑左下之後就坐返埋位。
我同阿奈返到落黎，見到佢地幾個各有各坐，氣氛古古怪怪咁。
阿奈梗係行返埋阿sam隔離坐。
「同佢傾成點呀？」
「我講左佢知之前係因為跳樓所以失左憶，但係咩原因就無講到。同埋…我睇佢自己都好似唔係好接受到咁。」
「梗係啦，妳無啦啦同我講我自殺失憶我都接受唔到啦。」
「我仲話左佢知，我地幾個由細玩到大…」
「咁佢有無講d咩？」
「佢話比d時間佢冷靜先囉，一時之間接受唔到咁多野喎…」
「唉，我都唔知阿鋒想唔想佢記得返晒。」
「哼！一日最衰都係條死八婆，唔係佢阿ka而家唔會咁啦！係喎，條八婆呢？」
「走左啦，阿鋒岩岩同佢講左分手。」
「散左！？條八婆咁順攤肯分手？！」
「其實佢都無做錯到…不過事情發展到呢一步，唔想分都要分架啦…」
阿奈行返埋位同阿sam傾計，我都好自然返返自己個位坐。咁我個位係阿逸隔離，自自然然就會坐係佢隔離啦。
「妳無乜野嘛？發生咩事呀？」佢一見我坐低個呆滯樣就問我。
「我都唔知…應該話我其實都唔係好清楚…頭先阿奈同我講，原來我失左憶，原因係之前我跳樓自殺…」
「妳咩都唔記得晒？」
「我淨係知道中間有段記憶無左…好似阿奈岩岩同我講，話我同佢地幾個係由細玩到大既，我其實無咩印象…」有種好沮喪既感覺浮現，失憶，嘿…
我講完之後，大家都靜左落黎無再講d咩。
我既直覺話我知，我同阿鋒之間一定係有關連，而且件事仲要幾大單下。跳樓自殺咁大件事，阿奈無理由會呃住我唔比我知道，佢唔講我知，就一定係唔想我知道。而且回想返出院之後阿奈既一舉一動，似乎好多野都係有心，唔比我同阿鋒有咩聯繫咁。
我坐左係個位度努力回想，幾乎完全陷入沉思之中，眼望前方但就咩都睇唔到，淨係想快d記返晒d野。雖然我諗既唔多，不過時間就過得好快，話咁快就放學。
「喂，放學啦，一齊走啦？」阿奈埋黎叫我。
「下？」我一時間仲未回過神，唔知發生咩事。
「無事呀？仲係傻下傻下咁既？放學啦，走啦。」
「唔好諗咁多啦，不如我送你返屋企好無？」阿逸見我反應遲鈍，於是提議。
「唔駛啦，你地走先啦，我想自己一個人靜下。」
阿奈見我仲係好迷茫咁，都知要比時間我冷靜同接受，唯有拉埋阿逸同阿sam佢地一齊走先。
出左學校門口既我漫無目的咁係條街度行，一路行一路諗，好多野我都仲係諗唔明，愈諗就愈入神，愈諗就愈頭痛。
「呯！」一聲巨響之後，隨之而黎既係混亂既人車聲。
但係係我既世界裡面，忽然所有野都靜晒落黎。
陽光直接射入我眼球入面，我望到個天空好藍好藍…
係我既視線範圍入面有好多人出現，仲有人不停拍我，但我望唔清楚佢地個樣。
迷迷糊糊之間，我聽到有人話有車撞到人，我知道，個個係我。
十分鐘之後，我已經身在醫院。
醫生護士都好緊張，啦啦臨就推左我入手術室。
個一刻，我淨係見到身邊既醫護人員好緊張，見到面前有盞好耀眼既手術眼。之後，我就陷入昏迷狀態。
就係我昏迷左之後，腦入面好自然咁不斷重現返以前既野。
由細到大同佢地幾個既片段，阿鋒既笑容，大家一齊個陣既吵鬧。阿奈同阿sam成日鬧交嘈交，狗咬狗骨，正當我地以為佢地成世都係咁，最後竟然爆冷門一齊左。我對住阿鋒個種心跳加速既感覺，係佢屋企既第一次，同佢一齊之後既幸福感覺。
但同時我亦記返起，阿鋒同阿柔件事，阿鋒點對我同埋講左d咩。仲有個BB，佢係我身上留低既唯一一樣證明，我記得，佢話要帶走BB。我跳樓自殺，係因為我受唔住呢個打擊，所以選擇帶埋個BB去死。
一幕幕往事好似無打算放過我咁，不斷係我腳入面重演又重演…個一刻既傷心同失望，而家清清楚楚係心入面體會多一次。
原來…阿奈想話我知既就係呢樣野。
原來…一直以黎係我心入面個個人，就係阿鋒。
阿奈呃住我暪住我唔比我知，就係唔想我記返起，唔想我再痛多次。
但天意既野真係好難講，無會諗到，令我記返起一切既，會係一場車禍…
Yuke 2007-7-30 10:43
一日之後我已經醒返，好彩，今次無咩大損傷，除左撞親個腦之外，就係擦損左d手腳，其他一切正常。呢次撞車，仲幫我回復左應有既記憶tim…其實都唔知係好事定唔好事。
拎起個手提電話望下，有成廿幾個未接來電。有其他人打比我既，有阿逸打比我既，亦都有阿奈打比我既。
我決定首先打返個電話比阿奈。而當佢聽到我話擒日撞車入左黎醫院之後，即刻就好緊張咁話同埋阿sam過黎探我。
係電話度，我無同佢講到我記得返晒d野。
的確，阿鋒係好傷我心，但係我仍然無嬲過佢。嬲佢？唔捨得，亦都嬲唔落。曾經有過一段短時間既憎恨，但我恨既仍然唔係佢，我只係恨自己，恨個天，恨天意弄人。
我望住個窗發呆，愈諗，愈心痛，連眼淚都不自覺咁滴左落黎。喊，其實又有咩用？如果喊真係可以沖洗晒所有傷心，就唔會愈流淚愈覺心痛。
或者當初佢無諗到咁傷我先會咁做。又或者，佢根本無理過我既感受，淨係想快快趣趣擺脫我然後同阿柔一齊。無論係邊一樣都好，都已經足夠證明我係佢心目中無重要過。
我唔敢講自己做左好多野令佢開心快樂，亦都唔敢講自己做既野係幫到佢既，但最起碼，我一直以黎都係佢身邊。我知自己無咩能力，甚至連做一個好既女朋友都唔識，不過我係真心愛佢，好愛好愛。
以前有人問過我，如果阿鋒毀左容又無晒錢無晒權力，我仲會唔會咁愛佢，仲會唔會繼續留係佢身邊？我個答案係肯定既，會，一定會。唔理咩事都好，只要佢需要我既，我都一樣會係佢身邊支持佢。
就係我發緊呆，胡思亂想緊個陣，有個人突然衝左入黎。
「妳無事丫嘛？！」係阿奈，佢一入黎就好緊張咁問我。
「無乜野，係撞親個頭姐，其他地方都係擦損左少少。」
「嚇鬼死我啦！無啦啦妳又做乜會撞車架？！」
「過馬路唔小心囉。放心喎，而家都無乜事，唔駛咁緊張啦。」
「唔係啦！計我話妳呢排都係黑仔，出院之後都係同妳去拜下神好d！」
「痴線，妳幾時變得咁迷信呀？」我笑。
「乜呀！呢d野寧可信其有不可信其無呀！」
我同阿奈岩岩講到興高彩烈，阿sam就行左入黎，後面仲有個阿鋒。
一見到佢，我d笑容即刻收返起晒。
「妳點呀？仲有無邊度唔舒服？」阿鋒一入黎就問我。
「無呀，我無咩事…」唔知點樣面對佢好，而家我記得返晒d野，但佢地又未知。
「無事就唔好啦，下次自己小心d，唔好再咁大意啦。」
「我會架啦…」我企起身拉住阿奈，「奈，妳陪我去廁所丫…」
搵埋阿奈陪我去廁所係有原因既，一來我唔想留係度唔知同阿鋒講咩好，二來我想話佢知我我回復返記憶。
入左廁所，我企左係度，唔知應該點開口好。
「妳唔係去廁所架咩？」
「我…」我深呼吸左啖氣先繼續講落去，「我記得返晒d野。」
阿奈突然停止晒所有動作，呆左咁望住我。
「妳話咩話？」
「我記得返晒之前既野，失憶之前既野，全部都記得…」
「咁即係…阿鋒同妳…」
「嗯，我記得。發生過咩事我都記得一清二楚…」我打斷佢既說話。
「咁既然妳記得返…都唔知我去講啦…」
「有樣野我想問妳，個陣我個BB係咪因為我跳樓而無左？」
「嗯…」
「呼，我都估到…」都真係幾無奈，BB明明係自己想留低既，但係偏偏又係自己令佢消失左…其實諗起都幾心痛，我同阿鋒既第一個BB，就咁就無左…
「咁妳打算同唔同阿鋒佢地講？」
「我都未知…而家所有野都好混亂…」
「哎，妳唔好諗咁多住啦，啦啦臨養返好個身體出院先算，船到橋頭自然直嘛！」
同阿奈交代完之後，我就同佢行返入病房。
一返到入去，大家相處既場面即刻比頭先岩岩到個陣尷尬十陪。梗係啦，而家得阿奈知道左我回復記憶，但係阿sam同阿鋒仲未知架嘛，阿奈又怕講多錯多，咁咪大家都唔知講咩好囉。
「妳無事既話不如我地走先啦？」阿奈主動提出走人。
「我可唔可以留係度陪妳？」阿鋒聽到阿奈話走，突然向我提問。
我比佢嚇左跳，唔似佢，完全唔似佢，佢以前絕對絕對唔會咁問我，一向佢都係鍾意留就留走就走，從來都無問過我半句。
「你…你想既咪留係度囉…」我無反對，但亦唔算係同意，只係將個決定權交返比佢。事實我個心都想佢留係度，但留係度，我又唔知同佢講咩好。
「咁我地走先啦。」阿sam係阿奈未反對之前就已經拉走左佢。
佢地走晒之後，得返我同阿鋒兩個係度你眼望我眼。
「你坐啦…做咩唔坐？」我見佢企係度又唔講野，唯有開口叫佢坐低。
於是佢就坐低左係我張床隔離。
「做咩咁唔小心呀妳？下次過馬路記得睇紅燈呀…」佢摸左下我個頭，順手捉住我隻手問我。
佢捉落黎個刻我feel到自己個心跳左跳，佢隻手好大好暖，同以前一樣。
「我係度諗緊野嘛…咪無睇到囉…」我避開左佢既眼神，佢咁對我我反而唔知比咩表情佢好，何況我感覺到自己眼圈開始紅緊。
「做咩呀？」佢好溫柔，呢一刻佢講既每一句說話每一個動作都好溫柔。
「無事…」我一路擰頭一路答，但係始於唔敢望佢。
我知佢對我既影響好大，我亦都知道，其實我係點都走唔出佢手掌心。佢既一個動作、一句說話又或者一個眼神，已經可以令我死心塌地跟死佢一世。我知自己抵抗唔到佢既一切，無論咩事都好，我都會留係佢身邊。
「傻妹，妳唔係喊嘛？」佢輕輕力拉我過去。
我係有d眼濕濕，但又未至於喊既，鬼叫佢突然之間對我咁溫柔，感動架嘛。
當佢拉我埋去個陣，我既理智話我知唔應該比佢咁做，但係可惜，最後都係比情感戰勝左理智。
好想再一次比佢攬住，個種窩心又舒服既感覺，足以令我感動到喊。
就係佢既懷抱裡面，我終於都忍唔住喊左出黎。」
「做咩喊呀？唔舒服呀？」佢見到我喊，即刻就拎紙巾幫我抹。
「…我…我記得返晒…我記得我地既野…」始終都係忍唔住話左佢知。
「…幾時既事…？」
「今朝醒返個陣，我就已經記得…」
「之前既事…對唔住…」我諗佢呢句對唔住都應該諗左好耐先講出黎。以佢平時份人咁掘強，要佢講句唔好意思都難，何況sorry？
「我無嬲過你…真架…我唔捨得嬲你…」d眼淚好似唔識停咁，鼻頭一酸又再喊過。
「同返我一齊好無？我會好好對妳…今次係認真既…」
我望住佢，好想開口答佢一聲「好」，但係把口就好似不受控制咁，想講又講唔出，我唯有不停點頭點頭再點頭。
「老婆…」話音剛落，佢就一啖錫落黎。
呢個吻比起以前既每一個都黎得特別甜蜜。
其實佢問我個陣，我真係無諗過佢今次係咪再玩我，或者當我蠢，我甘心情願上多一次當，又有邊個肯定，呢次我都唔可以得到幸福呢？
今次，我會更加比心機去愛！一定！
紫霜 2007-7-30 14:14
ya 佢地可以係番一起啦~
巧心 2007-7-30 15:16
[u][color=Orange]-0-` 好 o 咀 ...
support 你 喔 ![/color][/u]
Yuke 2007-7-31 11:57
過左兩日我已經可以出院。
呢兩日阿鋒一直陪係我身邊，由食飯到飲水到訓覺。除左我叫佢返屋企沖涼換衫順手訓陣個段時間之外，基本上佢都係陪住我。
阿奈佢地自從個日之後就無再黎過，雖然佢都有打電話比我，但我無透露到我同阿鋒點，所以佢地仍然未知我地係返埋一齊。
而阿逸個邊，佢打左好多次電話黎，不過我一個都無聽到。唔係唔想聽佢電話，而係唔知點同佢講好。之前我仲話對佢有少少感覺，而家…真係咩都無晒。
或者咁樣對佢唔公平，但係如果勉強同佢一齊，我覺得對佢仲唔公平。自己個心有個人係度，無理由拖住第二個架，咁樣對佢傷害咪仲大？
「我幫妳搞掂晒出院手續啦，妳換埋衫就走啦。」阿鋒幫我執緊野。
望住佢既身影，我忽然有種苦盡甘來既感覺。咁耐以黎，雖然我做過既野唔多，亦唔係咩大事，但佢終於都感受到我愛佢。
當我係廁所換完衫出黎，佢就拖住我隻手慢慢行。
「今晚黎我屋企訓好無？」
「嗯。」我笑。
一路行返佢屋企，一路都覺得自己好幸福。因為我不停咁笑既關係，身邊既途人簡直當我青山出黎咁望住我。
「做咩係咁笑呀？」佢見到我笑就問。
「無呀，開心咪笑囉。」事實我真係好開心，開心到搵唔到一個形容詞去形容。
「傻妹。」佢嘴角拉起一個大大既弧度，好燦爛既笑容。
咁耐以黎我淨係見過一次佢咁樣笑法，而個一次就係係Disco度，我第一次見到佢同阿柔傾計，個陣佢就係咁笑。
原來我都可以令佢咁笑法，即係原來我都可以令佢覺得開心快樂。不過而家面對面見到佢呢個笑容，我反而有d不知所措。
無他，佢笑起上黎個陣成個小朋友咁，好可愛，仲搞到我面紅tim。
「妳面紅呀？」佢即刻就發現左我面色唔同，黎招明知故問。
「無呀！邊…邊有呀…」咁既情況梗係死都唔認啦！認左又比佢笑架啦！
「咁都話無？」佢突然抬高我個頭。
嘩！面對佢既笑容加眼神我真係頂唔順！我想像到自己而家個樣一定好似個蕃茄囉！
「無呀無呀！行啦！」為左改變佢既主意力，我唯有起勢拖住佢行。
去到佢屋企，一入門口已經有個疑問，乜d野唔同晒既？
我之前失憶姐，而家無呀，佢屋企之前明明唔係咁架喎。
我同個好疑惑既眼神望住佢。
「之前既野比我換過晒啦…」佢一句說話解釋左我頭上面既問號。
「做咩換過晒d新野既…？」
「以前既野仲留黎做咩？而家換過晒d新野，咪當係一個新開始囉…」佢表現得有d不知所措，場面好搞笑。
佢唔係怕羞嘛？！如果係既話我會好驚架！
「你…怕羞呀！？」我想知，所以我問。
「痴線！」佢擰一擰轉塊面，笑住答我。
「咁係唔係姐？」嘻嘻，我認我係有d得寸進尺，咁想知就梗係要問架啦！
「妳就怕羞！」佢掃一掃我個頭。
我再無問落去，因為佢個樣同表情已經話左比我知佢係有。真係覺得佢改變左好多，多到…我有d接受唔到。
「其實…你唔駛特登咁對我架…你做返你自己啦…」
「我一直以黎都做緊自己呀…」
「但係你改變左好多…」
「以前係我唔識得珍惜妳，而家我唔會再係咁架啦。」
聽到佢呢句，我真係由心入面笑左出黎。
第一次， 第一次我主動錫佢，主動攬住佢，仲要係攬得好實好實個隻。
然後佢抱起我入房，佢表現得有d激動，我感覺到佢好需要我，所以我亦好努力咁配合佢。
我諗，呢次係我唯一一次對住佢可以咁主動咁放。
第二日一早起身，同阿鋒落街食左個早餐就返學。返到學校，阿sam同阿奈已經坐左係度。阿逸仲未返黎，望都望佢今日唔好返，如果唔係都唔知點面對佢好。
「嘩！你兩個…咪住！做咩你兩個會拖住手返黎架？！」阿奈一見到我同阿鋒拖住手入課室，就將原本想講既吞返晒落肚。
「拍拖唔拖住手返唔通掛住野返咩…」
「你…！家陣我問你咩！阿ka，妳答！」阿奈唔忿氣比人串，梗係轉頭問我啦。
「咁一齊咪拖住手囉…」我鬼識點答你咩，問黎都多餘既，拍拖梗係拖住手啦。
「你兩個一齊返啦？！」
「嗯…個日你地係醫院走左之後已經一齊返啦…」我笑。
「好野喎o靚仔！咁快就比你追返掂。」阿sam拍一拍阿鋒個膊頭。
「駛乜講？你估好似你咁呀？成世比條女食住。」
「而家無事就串我啦？前排又唔見你咁講？」
「咪係！何況我邊有食住佢呀？你估好似你條女咁好咩？一d主見都無！」
「你班人真係無聊，搞咁多野出黎最後咪又係一齊？而家仲要為d小事黎嘈。」阿龍一路睇漫畫一路講，連望都無望過我地。
「又關你事？！收聲啦，八公！」阿奈一本書車埋去，阿龍梗係閃得快好世界啦。
「妳打我唔到，妳打我唔到。」佢個樣仲要得得戚戚咁。
嗯，我相信阿奈就黎比佢激死。
「低能仔。」佢啤住阿龍講完，跟住又擰住頭同阿鋒講，「我警告你呀！咪再好似上次咁對佢呀！如果唔係我真係打你架！」
「喂，你條女好煩呀。」阿鋒同阿sam講完呢句之後就搭住我膊頭行。
我當然係陰陰嘴笑跟住佢行啦。
「喂！你企係度呀！頭先講咩話！？」
「話妳煩呀。」阿鋒望都無望，仍然繼續行。
就係我地幾個玩得好開心之際，阿逸突然出現係課室門口。
我見到佢，向佢笑左笑，點左下頭就算。反而企係我隔離既阿鋒就不斷用眼神挑釁緊佢，我知道，阿鋒係度向佢不威嘛。
阿逸既反應比較大，當佢入黎見到阿鋒攬住我個陣，明顯面色一沉，仲即刻擰轉身走左出去。
其實我都想搵佢傾清楚，尤其之前我地唔多唔少都發生過d野，所以我決定，都係出去搵一搵佢比較好。
「老公呀，我…我想出一出去搵阿逸…」咁我出去搵佢之前都會同阿鋒講聲先既，廢事比佢誤會啦。
「搵佢做咩？」
「同佢講清楚囉…咁你都唔想就咁就算架…你都知我同佢點架啦…」嗯，我有講到比阿鋒知，係我失憶個段時間裡面阿逸對我做過d咩。
「都好既。快去快回，有咩打比我。」佢諗左陣，終於都點頭比我出去。
其實會有咩事丫？斷估阿逸都唔會強姦我啦。
Yuke 2007-7-31 11:57
我行到出去，見到阿逸既身影係樓梯口向天台方向出現，於是急步追上前。
上到天台，就見到佢一個人企左係度食煙。
「喂，做咩自己走上黎食煙咁悶呀？」我拍左佢一下，故作輕鬆咁問佢。
「無野呀，可以有d咩？」
「對唔住呀…」除左呢句，我都唔知可以講d咩。
「做咩無啦啦同我講對唔住？」佢苦笑左下。
見到佢咁既樣，突然覺得佢好慘，唔忍心將個事實話佢知。不過唔忍心都要講，無理由因為佢既一個苦笑而放棄阿鋒同佢一齊架姐？
「我同返佢一齊啦…」
「其實你兩個之間發生過d咩？」
「你真係想知？」
我見佢點頭，深吸左啖氣。佢想知，無理由唔話佢知既，其實又唔係d咩唔見得人既事，同佢講都好既，起碼佢清楚知道我同阿鋒經歷過d乜，死心都會易d。於是我就一五一十講晒佢知。
「…就係咁啦…」呼，終於都講完。
我留意到，我一路講佢就一路眉頭緊接，表情仲轉換左好多次。
「妳肯定佢而家唔係玩妳？」佢問我。
「我唔肯定…不過就算佢真係玩我，我都甘心。」
「…妳自己鍾意就得啦，最緊要妳開心…」
「你…放棄我啦，我唔值得你鍾意…」
「值唔值得係我自己話事架姐。得啦，妳放心，我無事既。」
我知，我知佢係一個好男仔，我亦都知佢對我好好，係我唔識欣賞姐。或者，男人唔壞女人唔愛掛？
有時都覺得阿逸幾慘，付出左但又得唔到回報。不過愛情呢樣野，無得計較既，係咪？唔記得睇邊本小說講過，話大家係埋一齊總會有一方係付出多d既。亦即係話，付出比較多個方，一定係愛得深d既。
個陣都覺得佢講得好岩，但而家諗返轉頭，先覺得「愛」呢樣係界定唔到。無話邊個付出多d、犧牲多d，就一定係愛得深d。反而有d人，係拍拖既過程入面無做過d咩，但係到最後分手個陣，最傷心既可能就係佢。
Yuke 2007-7-31 11:58
如常地過左個幾月，生活一切正常，大家都身體健康、開開心心。阿奈係我撞車出院之後真係帶左我去拜神，都真係咪話唔信邪，拜完神之後精神好左，就連平時d小碰撞都少左，唔知係因為有阿鋒照顧我定還是真係咁靈啦。
個日係天台同阿逸傾完之後，佢就再無提過同我之間既事，但就仍然繼續同我地一齊玩一齊笑。大家都以為佢已經放低左我，甚至連阿鋒都咁覺得。
自從阿柔走左之後，我地就無再見過佢。聽聞佢已經轉返去以前間學校，繼續過佢既乖乖女生活。
呢日大家照舊齊齊係班房悶到趴街。
阿sam有事無返到黎，阿鋒係度訓緊覺，我同阿逸一邊吹水一邊研究緊d八卦雜誌。而阿奈同阿龍就悶到發慌，係度唔知做咩好。
「唉，做咩會咁悶架？！」阿奈講。
「係啦，日日都係返學等放學，都唔知學有咩咁好返。」阿龍搭嘴。
「咪係，我呢世人最憎就係返學！」阿奈講呢句個陣個樣簡直係咬牙切齒！
「哎呀…搵d野做下啦…」阿龍悶到連講野都死唔斷氣。
「喂！不如我地黎鬧交囉？！」突然之間，阿奈爆左句咁既野出黎。
「都好喎！好過係度悶呀！」
下，唔係掛？！阿龍你唔係咁白痴陪佢癲呀？！
「你兩個係咪白痴架？咁既野都好玩？」我完全係好無奈咁望住佢兩個囉，估唔到好識唔識，識埋成班都係痴既。
「唔好理佢姐！我地黎鬧交！」
「妳唔好一陣唔夠我黎又係度扮喊呀！」阿龍呢句已經預備開戰啦。
「我幾時有扮喊呀！？我真係喊架！」
「係呀係呀，邊個娶著妳做老婆就真係唔況唔喊啦！」
「家陣我好差咩？！又無人叫你要我！」
「梗係差啦！樣又無身材又無都算啦，連個腦都無，咁就死得啦！」
「你老味，你而家話邊個無腦呀？！」哈，比人串又唔忿氣。
算吧啦阿奈妳，明知同阿龍嘈無妳著數架喎，係妳先咁蠢同佢玩。
「擺明話妳架啦，咁點丫？而家先知原來妳唔止無IQ，就連EQ都無，死得！」
「你好啦喎！係咪仲要串呀？！」
「我無串妳喎，又係妳自己話要嗌交先既。」
「你．好．野！」阿奈一字一句。
「喂，你兩個細聲d啦，阿鋒訓左架。」佢兩個玩到鬼死咁大聲，一陣嘈醒阿鋒就知死。
「咩呀！我再大聲d都得呀！」阿奈唔夠阿龍玩就轉頭同我鬥氣。
「廢事同妳講咁多。」我先無佢兩個咁好氣，由佢兩個慢慢玩。
「點呀，好嬲呀？」
「邊個得閒嬲你呀！我似係d咁小器既人咩！？」
「妳就係咁小器！哈哈！」阿龍又成功入多次位，開心到大笑。
睇見佢兩個咁樣，我同阿逸都只可以講句，無聊。
「你兩個嘈夠未呀…？」都叫左佢地唔好咁大聲架啦，而家嘈醒阿鋒啦。
「關你咩事姐？訓你既覺啦！」
阿鋒都唔想理佢地，擰轉頭諗住繼續訓。
「好啦，唔好再嬲啦，妳唔係咁唔玩得既。」基本上，每次阿龍激完佢之後，都會主動
Yuke 2007-7-31 11:58
就係我地差唔多行到屋企門口個陣，我地見到有個類似女性既物體企左係阿鋒屋企門口。初時我以為又係阿鋒d狂風浪蝶啦，事關佢地成日都走黎屋企搵阿鋒。點知行多兩步先發覺，原來個女仔邊個都唔係，正正就係阿柔。
「喂！妳條八婆又想點呀？！」阿奈一見佢就火滾，開口就鬧。
「我有d野想單獨同妳傾下…」佢無理到阿奈，反而望住我同我講。
「有咩妳同我講得啦！」
我望住阿柔諗左一陣，決定都係同佢去傾下。
「算啦阿奈，由我同佢去傾下，我諗無事既。」點樣都好，件事始終都要有解決既一日。就算今日唔傾，聽日或者後日都要去，要黎既點都要黎，避都避唔過，倒不如早一日解決，我仲可以早一日安心。
「做咩唔比我同妳一齊去姐？」
我知阿奈擔心我，但呢件事點講都係我地之間既事，無理由下下都要拖埋人地落水架姐？何況佢搵得我要求單獨傾，就一定有佢想講而又唔想比其他人知既野。
「唔駛擔心喎，我同佢落樓下間茶記，個度咁多人係度唔會有事既。」
「咁好啦，妳自己小心d，有咩打比我啦。」
我望一望阿柔，然後帶頭行左落樓。
落到茶記，我第一時間行到最入既卡位坐低。揀個度黎坐因為個度夠靜，又唔會有人成日行黎行去。呢間茶記我地成日黎，阿鋒佢地d o靚仔都係度眾腳，老闆同d伙計都識得我地。當然，阿柔跟住阿鋒咁耐，呢間茶記d人都識得佢啦。尤其係阿鋒d o靚仔，佢地又點會唔認得阿柔？所以當我地一齊行入去個陣，大家都對我地投以好奇既目光。
「飲咩？」一坐低我就問阿柔。
「熱檸水。」
我隨口叫左杯凍奶茶，點左支煙，之後就一直都無再出聲。
望住面前既阿柔，發現佢明顯地瘦左好多，亦都憔悴左好多。原來失戀既女人真係可以老得咁快，唔知個陣我失戀係咪都好似佢咁呢？
「妳搵我咩事？」始終都要有人打破靜局，佢唔出聲唯有我黎。
「我其實唔係有心搵妳…」
唔係有心？唔係有心既話佢唔會出現係阿鋒屋企門口。佢就係有心，先會企係度等我返黎。
「係咩？」我無咩表示，你地可以話我擺緊高姿態既。
「妳…而家同阿鋒好嗎？」我留意到佢一直係度玩緊手上隻茶匙。
「有心。」我停左停，「妳黎唔會淨係問我呢d問題咁簡單，都係開門見山講比較好。」免得再同佢兜圈子，兜黎兜去對大家無好處。
「其實…」佢停低飲左啖野先繼續講落去，「我黎係想同妳講，我有左。」
佢終於都望住我。坐低左咁耐，佢呢刻先真真正正夠膽正視我。
「…妳有左關我咩事？」聽到咁既消息，我當然係震驚外加接受唔到。不過震驚還震驚，我仍然保持冷靜繼續呢場對話。
「個BB…係阿鋒既。」
我知，我就係太清楚個BB係阿鋒既，先會有咁既反應。
「妳有咩證據證明係佢既？」我承認呢一刻既我係有d咄咄逼人。我唔知咁做岩唔岩，我淨係知如果我唔保護自己既話，阿鋒就會再一次由我手上失去。
「妳知、我知，阿鋒都知。我有左個幾月，同阿鋒分手既時間吻合。如果妳仲係唔信既，我可以同妳去驗DNA，醫生方面可以由妳選擇。」
我突然之間覺得好驚，竟然搬到DNA出黎，連醫生都可以比我選擇，好明顯佢係有備而黎既。我在明佢在暗，我完全諗唔到佢下一步會做咩。
「…咁妳想點？」我開始有d無力招架既感覺。
「我決定將個BB生出黎。」
我無出聲，等佢繼續講落去。佢黎，絕對唔會淨係通知我要生個BB咁簡單。
Yuke 2007-7-31 11:58
「雖然醫生話過我生BB可能會有危險，但係我唔可以放棄呢個機會。妳應該知道，失去左一個人都會想留返d屬於佢既野係身邊既心態，當初妳都係咁姐。」
「但係當初我無搵過你地任何一個人去解決呢件事。」我講既係事實，當日就算阿奈知道我有左，我都無要求過佢地為我做d咩，我選擇自己一個承受。更加無諗過要通知阿鋒，係我思想裡面，我覺得無咁既必要。
「我而家黎搵妳，係想妳將阿鋒還返比我。」終於都講出口，佢黎既最終目的。
「還？感情唔係禮物，可以妳送比我我還返比妳？」真係好笑，佢當愛情係咩？
「妳知我意思唔係咁。BB唔可以無爸爸，我更加唔可以無佢。醫生話過如果我再好似而家咁既情況落去，唔止會無左個BB，就連條命都可能會無埋。但係我控制唔到自己，自從無左阿鋒係我身邊，我就食唔落訓唔著。所以我求妳，還返佢比我，當係比條生路我地兩母子行。」
我苦笑，我比條生條你地既同時，又有邊個比返條生活我？妳唔可以無左阿鋒，唔通我又可以咩？
「我而家已經咩都無啦，個陣我同返阿鋒一齊之後，屋企人已經唔再理我，朋友更加無乜，而家又有BB係身，d錢都用得七七八八，檢查費醫生費藥費咩都係錢，我就黎支持唔到架啦…」聲淚俱下，唔知佢係做戲定係黎真，無論係邊一樣都好，睇落都好真實。但如果呢一刻佢係做緊戲既話，咁我諗佢應該去拎金獎像影后，「妳同我唔同丫，妳而家無BB，又堅強過我，我相信妳可以好快就無事。第時妳出到黎仲有大把好男仔比妳揀，仲有阿逸呢係咪？妳放手啦，我求下妳比返個老公我…」
哈，呢番說話真係好動聽，表面上係想話我知我仲好有吸引力，但其實係想叫我比返阿鋒佢。呢d咁既說話你估我唔識講咩？唔係。但點解當初我無咁同佢講？就係因為我知道勉強黎都無用。
「淨係我一個同妳講無用，就算我真係肯放手，阿鋒都未必肯。」
「唔會架！妳肯放手既話佢就會同返我一齊架啦！」唔知佢係咪覺得我開始動搖，於是加重兩錢肉緊。
「妳都知佢份人架啦，如果佢唔願意既，咁到頭黎個結果都係一樣姐。」
「點解妳唔肯放手姐？！妳做咩一定要同佢一齊？！」佢情緒開始失控。
「因為我愛佢。」係，真係因為我愛佢，所以我唔想放手。雖然我知道愛一個人唔一定要同佢一齊，但我而家同佢係真心相愛，我知道佢愛既係我。起碼，我相信係呢日之前佢都係愛我既。
「妳夠我愛佢咩？！我為左佢咩都可以做，我可以比人丟落街！妳得咩？！妳為左佢做過d咩？！」
無錯，我真係咩都無為佢做過，問我我亦唔知道自己係咪真係可以幫到佢，但唔代表我唔愛佢，唔代表我就可以失去呢個人。
「妳冷靜d先啦，咁激動對妳對個BB都唔好架。」我唔想因為我而有人受傷，更加唔想害左個BB。話晒呢d都係大人既事，個細既係最無辜。
「我唔駛妳理我！妳唔還返佢比我我都係死路一條姐！仲理個BB黎做咩？！」
「妳比我考慮下先好無？我遲d再聯絡妳。」我無等佢答我就企左起身，「呢度有d錢，雖然唔係好多，不過都夠妳為個BB做檢查同生活，妳拎住啦。」我放低左幾百蚊係檯面，埋左張單之後就走人。
行出門口，我真係重重咁透左啖氣。
岩岩既一次對話真係將我搞到筋疲力盡，由細到大我都唔識點用心計，而家要我同佢玩心理戰，去計算佢下一步會做d咩，我真係覺得透唔到氣。
返到屋企之後，我坐左係床邊慢慢去諗成件事。
我唔知應該點樣去做，亦唔知應該搵邊個去傾，總之就覺得好混亂。
我當然有諗過同阿奈傾下，就算佢未必幫到我都起碼有個人分擔下，但係回心一諗，我又覺得現階段同佢講咩都無用。第一，我唔知阿柔係咪真係有左；第二，我唔知阿鋒知道之後會有咩反應。如果而家講左比阿奈知既，佢一定會同阿sam講，阿sam知道之後，阿鋒都會知。
最大問題都係係阿鋒身上，話晒阿柔都係佢舊情人，佢又曾經同阿柔有過咁深厚既感情。舊情人有左自己骨肉…我真係唔敢想像佢知道左之後會變成點。
紫霜 2007-7-31 17:10
呀ka好令女家?
巧心 2007-7-31 22:37
個 呀 柔 吹 水 架 ?!